رد: حلقات من عالمكشوف

من طرف شكسبير في الثلاثاء ماي 13, 2008 12:44 pm

أخر سؤال

_عجبك هيك ضروري تسأل هالسؤال يعني
_ مو على اساس ديمقراطية وحرية رأي والرأي الآخر ومابعرف شو
_لك ايه بس مو لهدرجة الف مرة قلتلك مافي داعي اطول لسانك وتحكي شروي غروي
شفت سؤالك لوين وصلنا
_صحي لوين وصلنا
_والله مابعرف .. مابعرف وين وصلنا ..منيح عم اعرفك من صوتك
_بس لازم نعرف وين وصلنا
_الله لايعرفك شو عم يوجعك ... طول عمري بقلك انت واحد غرار وكتير غلبة وبتدخل باشياء ما بتخصك
وبتسال اسئلة ما بتنزل بأبان
_اي كل شي سألتو سؤال صغير هو ياترى ايمتى رح..

_ _ لك هس ..
.هس الله لايوفقك ما بيكفي وصلنا لهون
_ ليش هنيك احسن من هون كلو متل هون
_قولتك ..متل بعضو
_طالما متل بعضو خليني اسألك سؤال
_اسآل ..
_دخلك اديش الساعه هلئ
_لك هسس ليش عم تسأل
_ مجرد سؤال ... حسب يعني
_حسب شو ..
_حسب الحالة ..
_أي ماشي الحال ..
_ وينك
_ ايه
_هلئ إذا واحد مشي تلت خطوات احسن مايمشي خطوتين ولا إذا كان ماشي اربع خطوات احسن
_ليك إذا قسمن بالنص وكب نصن بالبحر وبتجمع فوئين تنتين وبتقص تمانة بصفي معك انك بجوز تصفي واقف بأرضك هاد احسن شي
_يعني وحدة لقدام و وحدة لورا
_ وحدة لورا والتانية لورا..
_ ماشي

من طرف **HuNTEr** في الثلاثاء ماي 13, 2008 2:17 pm

الله يرضى عليك يا شكسبير

من طرف شكسبير في الجمعة ماي 23, 2008 2:53 pm

سؤال لئيم

علتان : الله لا يوفقو ما الئمو الله لا يعطيه العافية شو لئيم الهي تفرجيني في يوم بجاه النبي

فلان: لك مين هاد؟

علتان: الله لا يوفقو شو نجس

فلان: هي شبك شبك عم تبربر هيك وعم تدعي على مين عم تدعي؟

علتان : عم تحكي معي؟

فلان : اي معك شبك شو صاير معك احكي

علتان : على واحد

فلان : بعرف على واحد بس يعني شو مساوي معك؟

علتان :هادا يا سيدي هلأ انتي فاضي احكيلك ؟

فلان: اي ولو احكيلي شو علي اذا كان انتي ما فضفضفت وريحت وحكيت اللي بنفسك
لصديق عمرك لمين بدك تحكي

علتان: هادا يا اخي رحنا اشتركنا بهاي المسابقات عالهوا قلنا لحالنا بما انو اكلين هوا بلكي منروح ومننتفعلنا بقرشين نضاف
فلان : اي شو علي ما في حدا احسن من حدا بعدين بعرفك انتي زكي وفلهوي وهيك بتلقطها عالطاير

علتان : عالطاير؟ الله لا يعطي العافية طير الجائزة الكبرى طيرها هادا ابن ال...........

فلان: لك خلصنا شو رجعنا عالدعاوي قلي شو صار معك على مين عم تدعي؟

علتان: عالمذيع يخربيتو على هالسؤال شو لئيم لئيم

فلان :بس انا بعرفك مثقف وفهيم زكي وواصل للاعدادية وبتقدر تنفد حالك بقى شو هادا السؤال اللئيم اللي ما عرفت تجاوب علي؟

علتان :لك يعني هوي بالاول كان هيك ماشي بشكل معقول وعم يعطيني اسئلة سهلة

فلان: متل شو هالاسئلة؟

علتان :يعني هوي بلش باسئلة خفيفة : ما هي المسافة بين المشتري والارض اين تقع جزر الماو الماو وكم عدد السكان الاصليين الن من هو مخترع التلسكوب ما هو الموطن الاصلي لذبابة تسي تسي .................. يعني يعني

فلان : هاي الاسئلة بسيطة ما فيها شي

علتان :بعدين بلش يصعب الاسئلة شوي

فلان :يعني عن شو كانت هالاسئلة؟

علتان :يعني بلش يسالني ما هو عدد الخلايا المسؤولة عن الافعال االلا ارادية في الدماغ وما هي نسبة نمو الشعر عند الاناث في جزر الكاريبي وما هو عدد الاهداف اللي تسجلت بكاس العالم 1962 وما هو عدد قتلى الحرب العالمية الاولى وبعض المعادلات الرياضية من الدرجة الخامسة ......................يعني امور من هالنوع

فلان :انت ما بينخاف عليك بتدبر راسك ثم انو هاي الاسئلة عادية

علتان :اي وانا هيك توقعت بالاول يعني كنت متل ما بيقولو متل الزبدية الصيني من وين ما نقرتي عم رن

فلان : حلال عليك وبعدين ؟

علتان :وشو بعدين وشو بعدين الله لا يوفقو الله لا يوفقو بجاه النبي على هالسؤال اللئيم

فلان :هي هي علينا شو رجعنا على الدعاوي مرة تانية خلص قلي شو صار والله نطفتلي
قلبي

علتان: هادا يا سيدي بعد ما نفدت حالي ومشيت لاخر المسابقة اجا وسالني هداك السؤال اللئيم

فلان :وشو هادا السؤال بقى؟

علتان :سالني وقلي انتي كمواطن عربي أبا عن جد بتعرف وين الله حاطك ؟

فلان: يلعما شو هالسؤال اللئيم هاد

علتان :اي والله شايف على هالسؤال

فلان : وانتي شو قلتلو

علتان :شو بدي قلو صفنت صفنت بلشت ابكي

فلان: عالجائزة اللي راحت

علتان :لا والله على هالسؤال اللئيم

فلان :اي والله يخربيتو شو لئيم يلعما ما بتخطر على بال الجن الازرق قال وين الله حاطك قال

من طرف **أبو الطل** في الجمعة ماي 23, 2008 5:32 pm

بشرفي هالموضوع فخامة ..
جيبولنا ياهن فيديو

مشكور شكسبير

حلوة كتير زميل ...

جيدة جدا llooll

من طرف شكسبير في الأربعاء ماي 28, 2008 11:00 pm

هلا بالشباب على عيني